حالة غليان


كتب : دكتور/ ماهر حبيب فى موقع الاقباط الاحرار

على غير العادة هاجت وماجت الحكومة المصرية وعامت على عوم إخوان مجلس الشعب وأخذت أسرع قرار فى عمرها المديد وخالفت القاعدة المشهورة فى مسرحية عبد المنعم مدبولى (ثم أخذ يفكر ويفكر ثم عاد يفكر ويفكر)وقررت محاربة الأنفلونزا الجديدة والتى إسمها The Swine Flu بطريقة هى أعجب من العجب فقد تفتق ذهن أعضاء مجلس الشعب الذى يتكون من 50% من عمال وفلاحين يعنى بيفكوا الخط بالعافية وبعضهم بيسقط فى الإملاء فى إمتحان محو الأمية وخرج هؤلاء المثقفين ( لا أقصد المصفقين) بتوصية لم يتوصل لها كل دكاترة الدول المتقدمة وحتى المتخلفة وعلماء منظمة الصحة العالمية بجلالة قدرها وعلمها

وحرصها على صحة مليارات البشر وهى إعدام الخنازير فى مصر وطبعا الغرض من القرار الجاهل هو التخلص من الخنازير وخلاص على إعتبار أن الخنازير لا تدخل من ضمن مكونات الدولة الدينية برعاية طظ فى مصر وإخوانهم لأن المسلمين بيعتبروها حيوانات نجسة ومحرمة وطبعا هما أحرار فى التفكير وإن كان فى الحقيقة هما مش أحرار فى النقطة دى لأن نصوصهم الدينية بتفرض عليهم ذلك .

والغريبة إن مجلس الشعب المثقف والمتعلم خرج بالتوصية وفى أقل من 24 ساعة إجتمع رئيس الجمهورية مع المسئولين وقرروا إعدام الخنازير لأنها مصدر العدوى من وجهة نظرهم مع إن المرض بيتنقل من الإنسان للإنسان يعنى حتى لو كان المصدر من أي حيوان فالقصة الأن إن المرض بيتنقل زى أى نوع من أمراض البرد والسعال ولو طبقنا تلك القاعدة فعلينا إعدام البشر اللى بيصابوا بالمرض علشان منع العدوى وبالمرة نعدم الفراخ المصرية كلها ومنخليش ولا فرخة لأن إنفلونزا الطيور على عكس إنفلونزا سوان بتتنقل من التلامس مع الفراخ المريضة والحاجة اللى تفطس من الضحك بأن القرار أخذ طريقه للتنفيذ بالرغم من إن وزير الصحة والذى أكن له كل الإحترام لأنه لا يخشى المتطرفين (راجعوا موقفه من نقاب الممرضات)قد عرض وجهة النظر العلمية ولكنه صرح تصريحا يحمل فى طياته الكثير والكثير فقد قال سيادته : عقب اجتماع مع الرئيس المصري حسني مبارك انه قرر البدء فوراً في ذبح كل قطعان الخنازير الموجودة في مصر بأقصى طاقة ممكنة لتجنب ظهور مرض انفلونزا الخنازير في البلاد، مشيراً إلى أن عمليات الذبح ستتم بعد توقيع الكشف البيطرى عليها للتأكد من خلوها من أي أمراض.

وأضاف أن هذا القرار، وهو الاول من نوعه في العالم، اتخذ خلال اجتماع عقده مبارك مع لجنة وزارية مكلفة بمتابعة المرض، وأوضح أنه “تم خلال الاجتماع عرض الموقف الحالي الوبائي بالنسبة لانتشار المرض الذى يسمى خطأ “بانفلونزا الخنازير”، حيث ان المرض الحالي جديد تماماً ومركب من فيروسات مختلطة من الانفلونزا التي تصيب البشر وتلك التي تصيب الطيور، وانفلوانزا الخنازير، اي ان المرض الحالي ليس له علاقة بمرض انفلونزا الخنازير المعروف بيطريا

وواضح من صيغة الكلام إن الراجل المثقف والمتعلم والفاهم قال رأيه و لكن الضغوط كانت أكبر منه فرضخ ولكنه قال كلاما علميا عندما قال المرض مسمى خطأ بأنفلونزا الخنازير وأن المرض الحالى ليس له علاقة بالمرض المعروف علميا بمرض أنفلونزا الخنازير وطبعا ده بيورى إن العملية هيصة وزيطة وجدها متطرفى المحظورة وأتباعهم من دراويش الحزب الوطنى علشان يخلصوا من الخنازير دون سببا علميا وطبعا كلنا عارفين السبب الطائفى الحقيقى.

يا جهابذة مجلس الشعب ويا أعضاء حكومة مصر ممكن تقولوا لنا بأى سند علمى بتدبحوا الخنازير وبعدين بعد ما تخلص الهيصة دى حا تعملوا أيه فى أصحاب المزارع اللى خربتم بيوتهم وطبعا حا تقولوا عوضناهم بالفلوس وطبعا الجماعة دول حا يروحوا فى الرجلين وحا يحصلوا الغلابة اللى أخذوا شيكات لتعويضهم عن حرب الخليج ولغاية النهاردة لا طالوا بلح الشام ولا عنب اليمن وطبعا خبراء التعويض فى حزب الحكومة حا يحسب التعويض بالوزن وحا يقولوا إن كيلو لحم الخنزير بدون العضم والجلد والسقط يعنى الكيلو المشفى بيساوى نص جنية وفى أحسن الحالات بجنية يعنى حيدوا على الراس خمسين ستين جنية واللى مش عاجبه حيبعتوه المكسيك فورا فى رحلة اللى يروح وما يرجعش.

بالذمة حد يقولى ده إسمه أيه غير الأستعباط والإستهبال الإستسهال يعنى العالم المتقدم كله فى كفه وفلاحين وعمال البرلمان المصرى فى كفة تانية وده بيورينا حجم التطور والحضارة والعبقرية لأعضاء برلمان بلد كان مصدرا للحضارة ولكن على يد هؤلاء تفوقنا على كل الحضارات والدليل إننا إحنا اللى خرمنا التعريفة وإحنا اللى دهنا الهوا دوكو وسلم لى على الفهلوة والفزلكة ودقى يا مزيكة 

رابط المقال http://www.freecopts.net/arabic/arabic/content/view/5425/1/

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: