إعدام الخنازير في مصر


كتبت بنت مصرية

الموضوع ده بتاع الخنازير، اعدام الخنازير لمنع وباء انفلونزا الخنازير في مصر.. الحكاية دي تاعبة ضميري، ومضايقاني، وم الآخر مستحرمة اللي هيحصل ده

انا كل اللي صعبان عليا مخلوقات ربنا دي اللي هتتعدم من غير ذنب. يعني أولا، منظمة الصحة قالت ان مصر مافيهاش لسه انفلونزا خنازير.. والمنطقي وزي ما حصل في ازمة انفلونزا الطيور، انهم كانوا بيكشفوا على كل مزرعة والمزرعة الموبوءة بيعدموا الفراخ فيها، ليه دا مايحصلش مع الخنازير؟ واللي منها مش مصاب يبقى حرام نعدمه، نقتله، نحرقه..

انا مش مضطرة أوضح اني مسلمة وعارفة ان اكل الخنازير حرام، بس كمان عارفة ان قتل/صيد الحيوانات من غير سبب حرام. والخنزير رغم اني مش بحبه “عشان شكله وحش”، ومش بحب ابص له حتى، لكن كراهيتي الطفولية دي ليه ماينفعش تعميني عن ادراك حقهم في الحياة.. طول ما هم مش مصابين ولا نيلة

ونقطة كمان، لما تكون منظمة الصحة العالمية قالت ان معندناش لسه انفلونزا خنازير، يبقى نرمي نص بليون جنيه في الارض ليه؟ نص بليون يا عااااالم يا هووو…. الحكومة اللي معاها نص بليون جنيه مش تعمل بيهم مصنع “تامي فلو” عشان انفلونزا الطيور اللي بالفعل موجودة عندنا وبتتطور؟

نهايته، الاعدام نهاية مأساوية للخنازير المصرية اللي عاشت في مزارع الزبالة طول عمرها -وزي ما بيورونا بقالهم كام يوم في التلفزيون- يعني “لا هى شافت يوم عدل ولا هتموت عشان سبب منطقي”.. منك لله يا اللي في بالي!

—————–
-ملوحظة: ماكنتش ممكن اتصور ان هييجي يوم ادافع فيه عن اكثر المخلوقات اللي بكرهها في حياتي، بعد الفئران

-ملحوظة اتنين: اسرائيل اللي هي جارتنا لزم عندها حالتين اصابة، ومعروف طبعا ان المواطنين الاسرائيليين بيقدروا يدخلوا سينا من غير تأشيرات -بموجب معاهدة السلام- يا ترى هنعمل ايه وهنواجه موقف العدوى ازاي.. وخصوصا ان انفلونزا الخنازير بتتنقل من انسان لإنسان

رابط التدوينة http://www.bentmasreya.net/node/188

2 تعليقان

  1. -ملحوظة اتنين: اسرائيل اللي هي جارتنا لزم عندها حالتين اصابة، ومعروف طبعا ان المواطنين الاسرائيليين بيقدروا يدخلوا سينا من غير تأشيرات -بموجب معاهدة السلام- يا ترى هنعمل ايه وهنواجه موقف العدوى ازاي.. وخصوصا ان انفلونزا الخنازير بتتنقل من انسان لإنسان

    ::::::::::::

    الموضوع ده غلط
    مش أى حد بيعدى لسينا كده

    و كان قتل الخنازير له أسباب
    أكثر حظائر الخنازير فى مصر بيطعموا الخنازير فيها زبالة و فقط .. و بيربوا معها طيور ..
    يعنى الحظائر معرضة ” لألفونزا البشر + الطيور + الخنازير ”
    و يظهر النوع الجديد
    و هنا لا يوجد لدى المربين أى ثقافة صحية تمكنهم من الحماية ..

    يعنى ممكن نصبح مثل المكسيك .. نبقى مصدر للمرض

    تربية الخنازير فى مصر مقرفة جدااااااااااا جداااااااا
    أعتقد هى من غير أنفلونزا كلها أمراض

    و على الأقل خلى سكان المناطق هذه يرتاحوا من قرف الخنازير و الزبالة التى تأكلها الخنازير

    • استاذ شريف تربية الخنازير بهذا الشكل ربما تكون مقرفة ظاهرياً لكنها هى مصدر رزق هؤلاء الغلابة ولا علاقة لها من قريب او بعيد بموضوع انفلونزا الخنازير بل حتى إن الخنزير من اقوى انواع الماشية واكثرها مناعة فى مقاومة الامراض ، كما انها تقوم بعمل جبار وهو التخلص بطريقة طبيعية لا تضر البيئة من المخلفات العضوية (بواقى الطعام المنزلى ومخلفات اسواق الخضار والفاكهة ومحلات العصير ومخلفات المطاعم ومحلات الكشرى والفول ) وهى بالاطنان كل يوم من مدينة مثل القاهرة فأين ستذهب هذه كلها بدون الخنازير ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: