كل سنة وانتوا طيبين


أول تدوينة فى 2008، الزمن بيجرى فعلا، سنة جديدة راحت من عمرى وعمرك…..

عموما كل سنة وانتم طيبين …

و أتمنى تكون السنة الجديدة أحسن من اللى فاتت فى كل حاجة ، وخصوصا حالة حقوق الإنسان وخدمات الرعاية الصحية والسكة الحديد والتعليم ……..

أتمنى اشوف مصر أم حقيقية رحيمة بأولادها ….

أتمنى كوارث 2008 تكون أخف من كوارث 2007 ومانشوفش تانى عمارة زى عمارة لوران اللى لحد النهاردة محدش عارف كام واحد ماتوا فيها بالظبط ( سمعت أرقام تبتدى من 22 وتوصل لحد 82 قتيل )…..

أتمنى العدالة لأهالى جزيرة القراصية الغلابة …..

أتمنى كل شاب قاعد فى البيت يلاقى شغل …..

أتمنى كل بنت نفسها تتجوز تلاقى عريس …..

أتمنى أشوف فى 2008 ولو منطقة واحدة من المناطق المتوترة فى العالم وصلت للسلام والإستقرار …..

و أكيد بتمنى من ربنا إن علاقات المسلمين والمسيحيين تكون أحسن ومانشوفش أحداث زى إسنا وبمها وعزبة واصف غالى والعديسات بتتكرر تانى فى 2008 ………..

أتمنى حاجات كتير تبقى للأحسن وأكيد كل واحد بيتمنى كده ……….

على المستوى الشخصى أتمنى أنفذ ولو حاجة واحدة من مشاريع وأفكار كتير بأحاول اعملها مع بداية كل سنة جديدة وبأكتشف مع بداية السنة اللى بعدها إن مفيش حاجة أتعملت منها وأنها لسه أمنيات ومشاريع مؤجلة……

أهم حاجة حصلت لى فى 2007 أنى أخذت قرار البداية فى التدوين بعد فترة كبيرة من التفكير والتردد …..

وبنظرة سريعة للسنة اللى فاتت أكيد أهم حاجة عملتها السنة دى أنى أنشئت مدونتى ، شكرا لكل الناس اللى أضافتها لمفضلتها وشكر كبير لكل اللى نقلوا عنها أو حطوها فى قوائم مفضلات مدوناتهم ، وشكر لكل واحد أهتم بالتعليق على أى من تدويناتى حتى لو أختلف معايا فى الرأى …..

كل سنة وأنتوا طيبين …..

2 تعليقان

  1. كل سنة وانت طيب
    ياترى 2008 هاتبقى new year ولا مجرد another year
    سؤال…

  2. كل سنة وانتى طيبة يا ماريانا ، أتمنى من كل قلبى أنها تكون new year فعلا ،على المستوى الشخصى وهو كل اللى أقدر عليه بأحاول أنها تكون سنة جديدة فعلا، أما على المستوى العام فبنقول يا رب …

    شكرا لتعليقك وربنا يسعد ايامك ويحقق كل أحلامك ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: