صفط اللبن . . كدمة جديدة فى جسد مصر


مدن وقرى لا يعرف احد اسمائها خارج إقليمها وفجاة تصبح حديثاً لوسائل الإعلام العربية والعالمية ، تلك هى القرى والمدن التى يقوم فيها الإسلاميين بتهييج عامة المسلمين على الاقباط لإيذائهم ، وسط شعور تام بالحصانة من اى ملاحقة ، فلا إنتقام ينتظره احد من الاقلية المستضعفة ولا عدالة لتلاحق القتلة والمخربين واللصوص .. بل حتى إذا اتت قوات الشرطة بعد إستنجاد الاقباط (والتى تصل متأخرة طبعاً ) فإن اول ما تفعله هو القاء القبض على اى اقباط تقابلهم فى طريقها ليصبحوا ورقة المساومة الاولى مقابل تنازل الاقباط عن اعتداءت المسلمين ضدهم !!

اما حماية الاقباط فلا تعنيهم فى كثير او قليل ، وتشهد على ذلك كل الاحداث التى عاناها الاقباط منذ السبعينات حتى اليوم والتى حدثت فى ظل وجود امنى كثيف (ظاهرياً) لكن مع امتناع تام (فعلياً) عن اى حماية للأقباط ..

فى “صفط اللبن” بمحافظة الجيزة لم يكن السيناريوا مختلفاً عن اماكن كثيرة سبقته ، فقد بدات المهزلة بتحرش جنسى من شاب مسلم بفتاة مسيحية ، والتى استنجدت بأهلها فقامت معركة بين عائلتها وعائلة الشاب الذى تحرش بها ، إلى هنا والامر يكاد يكون حدثاً متكررا فى مصر اليوم التى تشهد حالة بشعة من السعار الجنسى والتحرش العلنى بالإضافة لما ينتج عنه من معارك متكررة قد تنتهى بمقتل اخو الفتاة التى تم التحرش بها او الشاب المتحرش او اى من اقاربهم ثم ينتهى الامر فى محكمة الجنايات.

لكن هذا يحدث لو كان الامر بين المسلمين وبعضهم البعض ،لكن إذا كان احد الطرفين فى اى معركة قبطى فهو يجد نفسه فى مواجه المسلمين جميعاً وليس عائلة او اهل خصمه فقط ، ولا يوجد ساعتها ادنى اعتبار لوجود الحق معه او عليه فالأمر سيان لمن يشعرون ان من واجبهم نصرة أخيهم فى الطرف المسلم سواء كان ظالماً ام مظلوماً.. وفى ثوانى يمتد الإنتقام ليطال كل اقباط القرية أو المدينة الذين لا يعرف احدهم ما يحدث او سببه ، لكنهم ليسوا مسلمين وهذا جرم كافى لإيذائهم وعقابهم “فالكفر كله ملة واحدة” ..

فتحدث حالة من العقاب الجماعى لأقباط القرية او المنطقة (ذلك العقاب الجماعى الذى كنا نحسبه لا يحدث إلا فى إسرائيل) ، وتبدأ حرب شاملة فى كل الحوارى والشوارع ضد الاقباط كباراً وصغاراً ، رجالاً ونساءاً ، فيتم الهجوم على بيوت الاقباط ونهبها ثم حرق ما تبقى منها ، ويحدث نفي الشئ فى محلاتهم وسيارتهم وكنائسهم ( لو وجدت كنيسة اصلاً فى المنطقة) .

saft-ellaban

وهو ما حدث بالضبط فى “صفط اللبن” التى تم شن حرب شاملة على الاقباط فيها منذ ايام عقب حادثة التحرش من الشاب المسلم بالفتاة المسيحية ثم خلاف العائلتين الذى قسم البلد لقسمين هما اكثرية باطشة وأقلية مبطوش بها ، وبالطبع حضرت قوات الشرطة متأخرة ليكون اول ما تفعله هو مصادرة أجهزة التليفون المحمولة من كل من صادفتهم من الاقباط ( خوفاً من تسرب ى فيديوهات او صور ترصد إعتداءات المسلمين على الأقباط) وقامت بالقبض على اربعة عشر من الضحايا الاقباط بينهم شخص مقعد وإليكم اسماء سبعة منهم وهم :

  • فرج جمال
  • جمال بشاي
  • مجدى وليم
  • هند ثابت عزمى
  • بيتر زغلول
  • ثروت فاتح ابراهيم
  • صبري شاكر (مقعد على كرسى متحرك)  بالذمة ده حيتهموه بأنه كان بيعمل ايه !!!

والذين تم إحتجازهم وتعذيبهم لإجبارهم على الاعتراف بتهم وهمية !!! أما الطرف المعتدى فكالعادة نالته نفحة من العطف الاخوى من القوات الأمنية التى تركت له الحبل على الغارب وافسحت له الأرض فشجعته بحيادهها السلبى بين جانى وضحية على الخروج من المسجد يوم الجمعة الماضى 15/5/2009 عقب صلاة الجمعة للقيام بحملة جديدة من إستهداف وإيذاء الاقباط الذين اغلقوا محلاتهم وحبسوا انفسهم فى بيوتهم تحسباً لهذا اليوم الموعود الذى يحلو للإسلاميين الجهاد فيه. ومع ذلك فقد وصلهم الإيذاء حتى بيوتهم وشرفات منازلهم ناشراً الفزع والهلع بينهم وبخاصة بين اطفالهم.

وفى نفس الوقت الذى تركت فيه الشرطة المسلمين يمرحون فى الشوارع بقنابل المولوتوف وجراكن البنزين والاسلحة البيضاء ، كانت تقوم بتفتيش أي قبطي ينزل إلى الشارع وتستولي على بطاقته الشخصية وتليفونه المحمول !!!

مازال الغليان والعدائية ضد الاقباط مستمران فى صفط اللبن التى إنضمت لقائمة طويلة من مدن وقرى الظلم التى قهر فيها الأقباط..

و لتصبح كدمة جديدة فى نفوس الاقباط ..

بل كدمة جديدة فى جسد مصر..

نداء أخير للحكومة لعلها تسمع :

بدلاً من ان تبعثوا بمندوبيكم الناعمين ذوى الملابس الانيقة والكلمات المعسولة لمحاولة إمتصاص غضب الاقباط فى نيويورك وواشنطن وفيينا وباريس ولندن لمنعهم من الصراخ من اجل اهلهم ، قوموا بواجبكم اولاً فى “صفط اللبن” لأن حماية سمعة مصر يبدأ فى “صفط اللبن” وليس فى “واشنطن” !!

ملحوظة أخيرة : الاخوة المسلمين العقلاء مازلت أسألكم اين انتم من كل هذا الظلم ؟ وهل يرضيكم ان تقترن صلاة الجمعة دائماً بهذه المهازل الطائفية البغيضة ؟

24 تعليقات

  1. أصل لو حاكموا المسلمين و ماذلوش المسيحيين الدنيا هاتولع و يمكن تقلب بهوجة زى هوجة عرابي
    الاخوة المسلمين العقلاء عقلاء و لكن للأسف الشديد جبناء

    • أخى الحبيب بسطاويسى إذا كنا سنصف عقلاء المسلمين بالجبناء فبماذا نصف إذاً المتعصبين الجهلاء ممن يكسرون ابوب بيوت الاقباط عليهم ومن يتحرشون ببناتهم ومن ينهبون محلاتهم ويحرقون كنائسهم ؟
      لا داعى للتجريح
      وشكراً لإهتمامك

  2. الاخ كاتب المقال كتبت فكذبت هل انت من سكان المكان الاخوة الاقباط يعيشون بيننا من بعيد الزمن وبننا علاقات حب كاملة وليس بيننا مشاكل ولكن ماحدث وما تحكيه فى المقاله ليس له اى اساس من الصحة وبلاش الاسلوب ده الضار بامن الوطن المشكله التلى حدثت ابسط مما تثيره انت فياريت تريحوا الوطن من اسلوبكم ده وبلاش اثارة الفتن الطائفية بين المسلمين والاقباط وعلى فكرة يوم الجمعة الا بتتكلم عيه لم يحدث اى مشاجرات مع الاقباط

    • الاخ الحبيب هانى
      لا تملك سوى النفى والتكذيب ، مهما نفيت فكل ذلك لن يخفى الحقيقة ، لقد إنتهى زمن إخفاء الحقائق ، هل فضح الظلم وإعتداءات الاغلبية على الاقلية تسميه اسلوب ضار بأمن الوطن ؟؟؟
      من المؤكد أنه كانت هناك علاقات محبة ومودة بين المسلمين والأقباط فى صفط اللبن قبل هذه الاحداث وهو ما يسعدنى وما أدعو له وأكتب من اجله ، لكن أيضاً الشحن الطائفى والتفرقة والظلم موجودين وإنكار وجودهم لن ينهيهم من الوجود بل يزيد تجذرهم …
      ما يضر بأمن الوطن حقاً وقد يورده مورد التهلكة هو كل هذا الكذب والتغطية والتبسيط والتبرير الذى تمارسه ويمارسه الكثيرين معك
      الأمان والعدالة والمساواة هى اول المبادئ التى تقوم عليها المجتمعات وتبنى عليها الاوطان ، وعندما تختفى هذه الثلاثة يكون الوطن نفسها معرضاً للخطر
      اهلاً بك

  3. أخى الفاضل
    السلام عليكم ورحمة الله وبركاته
    أنا مقدر لك مشاعرك.. ولكن أخى لاأعرف أشعر أن هناك
    أيادى خفية تحرك خيوط هذه اللعبة القذرة وما يطلقون عليه فتنة طائفية..
    مصر فى رباط إلى يوم الدين ولن يؤثر فى تلاحم عنصرى الأمة
    بعض الأحداث المفتعلة
    وسيظل المسلمون والأقباط أخوة فى الوطن لن يفرق بينهما
    مثل هذه الأمور…
    ومرة ثانية أشكرلك جهدك الطيب
    أخوك
    محمد

    • اهلا بك يا استاذ محمد ومتشكر لردك ، الايادى الخفية ربما تكون موجودة أو غير موجودة ، لكن ما يعننى هنا هو أين دور الدولة ؟
      أين الحماية لمواطنيها ؟أين العدالة ؟ أين إعادة الحقوق لأصحابها؟
      أين العدالة ، إنهم يجورون على الضحية ويساون بينها وبين الجانى ويعطلون القانون الجنائى ولا يحاكمون المجرمين ابداً على جريمتهم مما يعطى أشارة خضراء لا تخطئها عين للمعتدين ، أليس الإسلام هو من قال ( ولكم فى القصاص حياة يا أولى الالباب ) .. نحن لا نريد سوى القصاص العادل الرادع ..
      الحاصل انه مهما باغ حجم العنف ضد الاقباط ومهما بلغ حجم ترويعهم وخسائرهم المادية فى ارزاقهم ومهما بلغ عدد قتلاهم فى كل واقعة من هذه الواقائع المريرة فالنهاية دائماً واحدة الجناة طلاقاء بلا مسائلة ولا عقاب والضحايا ييجبرون على لعق جراحهم فى صمت مهين تلونه الدموع ..
      أتمنى بالفعل ان يظل المسلمون والاقباط اخوة …
      لكن على اساس العدل .. فالعدل اساس الملك

  4. GOOOD TOOOOO

  5. بصراحة ياريت الاهتمام كان اكتر من كده ولكن الحقيقى السبب فى اللى حصل المسؤلين لان مفيش اهتمام خالص بالبلد ديه انا مع اى حد فانه لو قال الناس هى اللى مبتهتمش لكن لو فى شدة من المسؤلين كان لايحدث هذا ابدا ومنهم عضو المجلس المحلى اللى مبيعملش حاجة حتى عضو مجلس الشعب حتى قسم التابع لنا

  6. احنا ممكن نعمل اى شىء كويس من غير مساعدة حدة بس فى دور التوعية فى الشيوخ فين الناس المثقفة هنا فى بلدنا ديه حد يقولى كده مين اللى يقدر يعمل فين الشباب اللى بيفكروا صح للاسف مفيش لكن لو فى توعية من كل بيت وكل مدرسة وكل استاذ وكل مربى ومربية بهذا هنبقى فى وضع احسن بكتير وانا اناشد المسؤلين من هذا الموقع وياريت حد يسمعنى ويعترف بوجهة نظرى انا محمد الفقى طالب بكلية طب بشرى اسكندرية ومقيم بصفط اللبن

  7. بجد لازم نتكلم بصراحة
    كل المشاكل تتلخص بأن المشكلة بين شخصين لكل منهما ديانته وكل واحد منهم بيبص للتاني على انه غريب (في لحظة ديه بس) يجي عمك الشيطان يوسوس في دماغ واحد فيهم يقوله لا ده مش احسن منك .. ده انت معاك فلان وفلان وخالك اللواء فلان وجدك فلتكان باشا … ونفس الكلمتين يوسس بيهم للمغفل التاني .. وطبعا الاتنين فاضيين وملهمش شغلة ولا مشغلة .. في لحظة يكبر الموضوع بدل المشكلة ما تبقى بين اتنين بقت بين اربعة الاربعة بقو ستة خلال نص ساعة بقت اضطهاد ديني وياه لو واحد متعصب من الطرفين دخل في اللحظة هتولع وتبقى حريقه
    كله علشان مين علشان الدين لا طبعا والاديان بريئة من اللي بيحصل.
    فهمتو المشكلة فين احنا عايزين نبقى صرحاء بين انفسنا في الاول قبل ما حد يقلنا نعمل ايه وكل واحد يبص لمستقبلة واكل عيشه ورزق ولاده .. الله يسامحك يا بلدنا خلاص من كتر الفضى مش عارفين نعمل ايه ؟؟؟
    وعجبي!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
    التوقيع
    واحد مخنوق من اللي بيحصل

  8. اضيف ايضا مقولة الدكتور البرادعي
    «إن الفقر وما ينتج عنه من فقدان الأمل يمثل “أرضا خصبة” للجريمة المنظمة والحروب الاهلية والارهاب والتطرف.»

  9. كاتب هذا المقال كداب جدا لنى من اهل المنطقة بتحديد انا اسكن بجوار مدارسة صفط اللبن الابتدائية وبلفعل حدث خلاف بين مسلمين واقباط وهى الحقيقة ولكن لم تصل الى درجة ان المسلمين ينتهكوا بيوت ونساء واطفال الاقباط وان الاسلام ليس من تعليمة ان نتهك الاقباط ولا اليهود والكفرين حتى وان كاتب هذا المقال انة من الكاذبين

  10. ده واحد كذاب جدا ولم يحدث اي شئ من هذا والناس في صفط بيحبوا بعض جدا بطلوا بقي شوية عايزين ايه يامسيحين من الدولة هتعمل ايه تاني منكم وزير المالية ومنكم البيئة ربنا يهديكم وترجعوا الى الحق والحق هو الاسلام ورسالة سيدنا محمد وعيب تعملوا كده

  11. على فكرة كل الكلام دة ليس له اى علاقة من الصحة لاننا ساكنين فى صفط من\ 10 عشرة سنوات ولم نرا اى من الكلام ده اتقو الله

  12. اللى كاتب المقال طبعا مسيحى لان طريقة الكلام واضحه فى شرحه للموضوع بيطلب طلبات ولاز علشان يطلب ويعرض لازم يكبر الموضوع وانا كنت واقف وشايف الموضوع من اوله لاخره اولا صبرى القعيد ده كان قاعد على حرف السطح وهما يدولوا طوب وهو يرمى على الناس وعلى المسجد اللى امامه ونسيت اقول لكم ايه سبب الموضوع ولا تحرش ولا قرف كل مشكله تحصل ومحدش عارف ايه اللى حصل يقوم مألف قصه والمنتشر اليومين دول الجنس طبعا فيقوم يقول واحد مسلم تحرش بوحده مسيحيه علشان الموضوع يلفت الانتباه واحد من اللى كان بيسلك اول الموضوع خالص اسمه ابو احمد هو اللى حكالى كانت المشاجره بسبب طفلين فى الابتدائى وهو اللى كان بيسلك مبينهم الولد المسلم ليه اخ منحرف اسمه سالم راح الولد نده لاخوه وشد الكلام مبينهم عند بيت صبرى المسيحى طبعا امام منزل صبرى كل اللى كان فى البيت ضربوا سالم وكبرت على كده وبالاماره جيه امين شرطه اسمه صلاح ابو شنب راح للمسيحين عند البيت ضربوه وناس منهم عارفين كويس صلاح ابو شنب

    • وانا كمان من سكان صفط اللبن وصفط ده مليانه مسلمين ومسيحيين وبالرغم من كده طول عمرى اشوف اد ايه المسلمين والمسيحين اخوات وبيحبوا بعض وده مش فى صفط بس فى اماكن كتير وبينهم مجاملات ولما كنت بشوف كده كنت بتذكر الايه.قال تعالى. لتجدن اشد الناس عداوه للذين امنوا اليهود والذين اشركوا ولتجدن اقربهم موده للذين امنوا الذين قالوا انا نصرى.صدق الله العظيم

  13. والله العظيم 3 اللى كتب المقال ده بتاع فتن مش اكتر يا راجل ده المسيحيين بهدلوا المسلمين انا كنت واقف بتفرج والجامع اتكسر ؟ بلااش كدب بئى واسلوب مستفز هههه صبرى بتاع الشرايط اها قاعد على كرسى متحرك بس كان قاعد وحاطط على رجله طوب

  14. والحكومه خدت من شارع محمد عبد الرحيم الموان مسلمين برضو ؟ والاتنين عملوا مصلحه ف القسم ورجعوا بيتهم بعد يومين بالظبط سواء مسلم او مسيحى ؟ احنا عندنا عداله وقانون سواء على مسلم او مسيحي

  15. احنا مصريين وهنفضل طول عمرنا مصريين سواء مسلمين او مسيحيين ؟ زيها زى اى مشكله بتحصل بين اتنين مسلمين او اتنين مسيحيين مش اكتر بس احنا بنحب نكبر الموضوع

  16. من الممكن انى اقول اسم غير اسمى واقول ان اسمى جرجس او ما شبه ذالك الى اتقال على صفط اللبن كدب فى كدب انا من صفط اللبن وكفايه ادعائات كاذبه مافى شى فى صفط اللبن وكله كلام فى كلام وتاليف

  17. علي فكره اللي انت كتبه انه حصل مع المسيحين هو ده اللي حصل مع المسلمين برضوا

  18. على فكرة كل ده محصلش

    انا ساكن فى بيت ابو فرج اللى ابنه ابانوب اتاخد المعتقل

    انا جارى اللى فوق اسمه بيشوى و اللى تحت ابو فرج و ابانوب و اللى فى وشنا فادى و اسرته و الشقة التانية ايهاب و اسرته

    كل دول مسحيين

    عمر ما حصل بينا مشاكل زى ما بتوصفوا كدا

    المشكلة كلها لأن عيل من شارع التلاجة عاكس اخت بيشوى ابن عم ابانوب اللى ساكن عند صبرى ( ذو المقعد )

    لما راحوا الناس جرجس و بيشوى و ابانوب و ماهر و راحوا ضربوا الواد اللى عاكس البنت

    الواد ده جاب صحابه من شارع التلاجة

    و اتلموا تحت البيت و ضربوا بالسنج و المطاوى و كل حاجة

    و اللى خلا الموضوع يكبر

    ان العيال الصغيرة لما شافت جرجس بيتخانق حدفوا ازايز بيبسى فاضية على اللى فى الشارع

    بس للتاسف واحدة منهم جت فى ازاز الجامع و كسرته و ده اللى خلى كل الناس تقف قدام باب الجامع

    على فكرة

    لما جرجس و بيشوى و فادى و ماهر و رزق و عم صبرى و كل الناس ديه كانت مستخبية

    كانوا مستخبيين فى الشقة اللى فوقينا

    انا مرضيتش اقول عليهم لأن دول اخواتى كلهم و بينا عيش و ملح

    يا رت منولعش الدنيا

    يا ريت نعرف ان زى ما فيه ناس وحشيين مسلمين فيه وحشين مسحيين

    يعنى الدينا مش كلها وحش و مش كلها حلو

    اللى عاوز يعرف التفاصييل كلها انا اقولهاله لأنى عشتها

    و على فكرة اان صاحب العربية اللى كانت تحت البيت و اتكسر ازازها لما حدفوا بيبسى من فوق

    يعنى اول حجاجة لو هيا فتنة كان زمانى قولت على مكان المستخبيين

    عيب اللى بتقولوه ده احنا كلنا مصريين

  19. هذا المقال افتراء و انى من سكان هذه القرية و لا يحدث فيها ما يقال إلا حوادث فردية و قتها سواء بتكون خناقة عادية بين جيران ملهاش أى صالح بالعقيدة أصلاً

  20. ياجماعه ليه منبقاش ذي مسلمين واقباط ثورة 1919 ايد واحده علشان نقدر نعدي بمصر للامان ارجوكم كونو ايد واحده انا اصحابي المسحيين اكتر من المسلمين وبحبهم وبناكل مع بعض عيش وملح مفيش بن اللي انتو بتقولو عليه وكل اللي بيحصل وهم في عقلكم فوقو قبل فوات الاوان احنا المصريين اخوه وايد واحده بس وقت الشده لا احن عيزين نكون ايد واحده علي طول عاشت مصر حره فوق الجميع

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s

Follow

Get every new post delivered to your Inbox.

Join 49 other followers

%d bloggers like this: